مجلس الهدايــا ...الله يحييكم كلكم تفضلوا................

[الهدايــا]

السلام عليكم ورحمة الله وبركاته

مساكم الله بالخير أخواني وأخواتي اعضاء المنتدى الغالين جدا

ودي أطرح عليكم هالفكرة واستاذنكم فيها وان شاء الله تعجبكم وهي انه كل يوم باذن الله او كل يومين انزل لكم سالفة حلوه سمعتها في مجلس او شفتها او صارت لي ولا تخلو من الطرافة أو العبرة واذا سمحتوا لي فمجلسي مفتوح لكم على طووول والله يحييكم عدد ما مشيتوا ويا هلا وسهلا بمجلس وخيكم الصغير الهدايــا..واتمنى منكم كلكم اللي عنده سالفه ويبينا نستفيد منها لا يبخل علينا لان المجلس للترويح عن النفس والفائده ومفتوح لكم لانكم انتم اهله ......


أول سالفه :

مرة من المرات وانا جالس بمجلس جدي ابراهيم وقاعدين نسولف مادريت الا ويدخل علينا شايب الله يذكره بالخير وقمنا وسلمنا عليه وحطه جدي براس المجلس( وكالعاده القهوه ) دخلت وجبت القهوه والتمر وقهوينا الرجال ولا ماشاء الله راعي سواليف مثل جدي وبصراحه ينحب ذا الشايب وكنيته ابو حمد
قال ابو حمد لجدي ماشاء الله هذا ولدك يقصدني قال لا هذا ولد ولدي عسا الله يخليلك (انا قلت عسا ماهوب جاي يخطبني من اهلي هههههههه) المهم قال وين الوالد قلت رايح لهاك الديره قال اوووه شوداه هناك قلت ليه وش فيها قال اسمع هالسالفه :

مرة من المرات تهاوش (تخانق) اهل الديره - ماودي اقول اسمها منع للزعل مثلا اسمها (ا) – مع أهل الديرة (ب) على الماء وكان هذا في عهد الملك عبدالعزيز الله يرحمه وكان الناس يتبعون الماء وين ما يكون يسكنون عنده المهم زارهم الملك عبدالعزيز الله يغفر له وحضروا عنده اهل الديرتين يتنازعون قال له واحد من كبار الديرة (ا) يا طويل العمر اهل الديرة (ب) ذبحونا نازعونا في مانا طال عمرك ودنا انك تشوف لنا حل معهم قال وين كبيركم يا اهل (ب) طلع واحد وقال سم طال عمرك قال وش صاير قال له والله ان هالبير لنا وحافرينها جداننا
بس هذولا الله لا يحللهم واطين على خشومنا وضحك الملك وقال لهم ليه ما تتقاسمونها يوم لكم ويوم لهم .......

سكتوا........ وقعدوا يطالعون بعضهم جازت لهم الفكره (طيب من اول ههههههههههه)
وطلعوا راضين
يوم جا من باكر ويجون متهاوشين مره ثانيه عند الملك قال امير ديرة (أ) يابوسعود(الملك) من يبدا الاول حنا ولا هم انا اقول حنا اول وطلع واحد من هناك يصيح تخسون حنا اول يا طويل العمر قعد يضحك الملك عبدالعزيز وقال تدرون عاد بقسم لكم البير قسمين بحبل احطه في نص البير انتم تاخذون من جهه وهم من جهه وخلاص (ههههههههه وشيسوي لهم عجز عنهم المصيبه انهم وافقوا على هالحل وطلعوا هههههه)
المهم جلسوا مع بعض اهل الديرة (ا) وقالو يالربع ترى اهل(ب) بيخلصون ماكم اسمع يا رويشد (صبي عند امير (ا) ) اذا جا في الليل خذ من ماهم وصبه عندنا ولا يدري عنك احد (والله حاااله هههههههههههه )
يوم دروا عنهم اهل الديرة (ب) راحوا وجابوا حمار ميت (فطيسة) ورموها على جهة هذولاك (هههههههههه وكلهم في بير واحد المشكله ) يوم جا من بكره ولا البير ما ينشرب منها وشدوا عنها (هههههههههههه حسبي الله عليهم )
**المهم انا قاعد اسمع السالفه مادريت الا جدي ناغزني صب للرجال يقصد ابو حمد ههههههه وانا منسجم مع السالفه **

وانا انتظر هاليوم اللي يرجع فيه ابو حمد ويعطينا سالفه ثانيه ...........


وسلامتكم ان شاء الله اعجبتكم ويهمني بصراحه رأيكم كلكم رجااااااااء



اخوكم

الهدايـا

[الرايق]

ههههههههههههههههههههههههههههههههه مالك داعي فضحتهم

حلو القصه كثر منها

[حمد]

اهلا اخي المبدع الهدايا

صراحه قصه رائعه ويا ليت لو نوقف عندها شوي بس ..

نستفيد من بعض الحكم .. مما لاحظت في هذه القصه هو طيبه قلوب الناس لكن متى !!اذا جيتهم بالطيب

تصديقا لقول الشاعر :

ان انت اكرمت الكريم ملكته .... وان انت اكرمت الئيم تمردا

بارك الله فيك اخي الهدايا

[عبدالرحمن]

الهدايا فعلا قصة رائعة والله يعطيك العافية :)



اللي اعجبني ذكائهم في طريقة تقسيم البير بحبل :) تحس انهم أذكياء مره

[وردة الإمارات]

الله يعطيك العافيه يا الهدايا http://www.asmilies.com/smiliespic/love/47.gif


و يثلموووو ايديك http://www.asmilies.com/smiliespic/psmilie/046.gif

[النصراوي]

حلوه السالفه يالهدايا

بس نص الموضوع كلمة {هههههههههه}

[عبدالله]

والله إبداع ياراقل


تسلم والله

[الهدايــا]

اهلييين اخوي الغالي الرايق يكفي انها اعجبتك ...

وتسلم على حضورك ...


الهدايـــا

[الهدايــا]

هلا والله وغلا فيك حمد ... الروعه في وجودك يالغلا ..

i agree with u


خليني اشوفك دايم ... والف شكر على التثبيت...


الهدايـــا

[الهدايــا]

اهليييين عبدالرحمن .. وشلونك مبطين عنك ...


اي والله اذكياء ..مدري وين جائزة نوبل عنهم ...


الهدايــا

[الهدايــا]

هلا اختي وردة الامارات ومرحبا بك في المنتدى واسف اذا متأخره ثلاث حبات ..(مو حبتين)


الله يعافيك ياااارب ويثلمك ...


الهدايـــا

[الهدايــا]

هلا اخوي النصراوي ..الله يحلي اياامك ...

طيب اقرا النص الثاني وانا اخوك....



الهدايـــا

[الهدايــا]

هلا وغلا عبدالله ...

الله انت قاي من المعادي ولا ايه ... عايز افهم .,.

الله يسلم غاليك ...



الهدايـــا

[الهدايــا]

السلام عليكم ورحمة الله وبركاته وشاخباركم ولهت عليكم موووت وان شاء الله انتم تكونون معي متواجدين على طووول الله يحييكم في محلكم يا بعدي

هذي هي السالفه الثانيه وهي موقف صار لي ......

مرة من المرات كنت في جمارك مطار الملك خالد الدولي بالرياض عندي بعض البضائع جايتني و بخلصها المهم وانا قاعد ماسك سرا في قسم الشحن الفوري ولا ذاك الشايب المسيكين ما يدري وين الله حاطه مدري من موصيه يطلع له اغراض ويقالك فزعه وتورط ابو الشباب ما يعرف شيء المهم شافني ولزق فيني ماروح مكان الا هو معاي المهم شافني وقال ياخوي المدير وينهو قلت له أي مدير قال يا خوي ما تعرف المدير قلت تبع أي قسم فيه الف مدير يا عم قال اللي يعرف يسنع اوراقي قلت عطني اشوف اوراقك وقلت له شوي خليك معي وادخل اوراقنا مع بعض قال لا انا بحاسب (هههههههه) قلت له يارجال ما بعد وصلنا للفلوس توك باول الطريق قال ايه اشوى المهم خلصنا اوراقنا وقلنا بنروح نسوي المنافست في الدور الثاني المهم يوم بغينا نطلع باللفت وكان فيه مصعدين واحد يمي وواحد يمه المهم وقعد يطق الباب قال هذا المدير علامه ما يرد ...!!!
قلت أي مدير الله يرحم والديك مشينا للكوفي شوب اللي هنا خل اقهويك (قلت يمكن يصحي راسه هههههههههه)
المهم وديته للكوفي شوب قلت وش تشرب يا عمي قال عطني ماء قلت ابشر وجبت له مويه وقلت له تبغي قهوه قال تنشدني؟؟؟؟؟؟؟ يعني (تسألني) قلت بس ماهيب قهوتنا يا عم قال وش حمستها ....!! قال ابيها قالطه ..!!!! قلت وييييين ليكون يبغى ربابه بعد ..
قلت ياعمي هذي قهوة ثانيه فيها قال عطناها لو هي سم هماها قهوة بس جبتها له وشربها قال قم قم مشينا نكمل اوراقنا ,....... والله ياني ضحكت يوم قال قم قم قلت الحين بيجيني طراق يمشي الفين كلم /الساعه يوم وصلنا للمصعد ونلقى واحد منهم نزل منه ناس قال يوووووه شكل المدير مزحووم اليوم ......؟؟؟؟ هههههههههه
قال مانيب رايح معك رح انت انا بشرب با قي القهوة (الظاهر جازت له )
ورحت للمنافست قالوا لازم يشرح عليها المدير العام ورحت له وكان يتكلم بالتلفون انتظرته لين خلص وعطيته الورقه وكتب عليها شوي الا ويدخل
خوينا قال انت هنيا قلت ايه قال للمدير يامدير خف ربك من هالناس اللي انت حاطهم ما يخافون الله ما يقولون هذا شايب ما يعرف حطوني بغرفة- يقصد المصعد ههههههههههه - لحالي ولا عرفت ادبر نفسي الا يوم جا اللحية الغانمة وهو يحتريك برا اباك تسرحه اليوم يروح لاهله هذا اللي يعرف الرجاجيل (انا حسيت انه يقصدني بهالكلمه اني ما اعرف الرجاجيل ... مع اني والله ما قصرت معه ) يوم دخل الرجال اللي برا ولاه عامل النظافه بنقالي وقعد يهزز راسه يوم مات ضحك المدير ووقع اوراقه واوراقي ومشينا .......


ان شاء الله اعجبتكم .......


اخوكم

الهدايــا

[حمد]

حلوه ذا القصه لكن اللي اتعجب منه !! كيف قدرت تتكييف مع واحد مثله !

انا لو مكانك الضغط يوصل الفين ..

لكن ما شاء الله عليك

يعطيك العافيه

وبالمناسبه اجل تتوقع البنغالي اللي طلع رجال !! يقدر يخلص امورنا في الجمارك ؟؟ واسطه !! :062::062:

[عبدالرحمن]

ههههههههههههههههههههههههههههههههههه اللي صبره عليه ياحمد سبب واحد هو ان الهدايا لزق الحساب في ظهر الشايب :):):)

[الهدايــا]

هلااا وغلااا اخوي حمد ...

اسف على التأخييير ..


والله الضغط عد واغلط .. بس الحمدلله عدت على خير ...

والبنغالي عندي رقم بيجر ولد عمه اللي قد غسل سيارة سواق جيران سكيوريتي في الجمارك


الهدايـــا

[الهدايــا]

هلااااا عبدالرحمن ..

اقول الله يرحم والديك بلااا فضااايح ... واستر ماواجهت وخلنا نقهويك القابله ...




الهدايــا

[عبدالرحمن]

:062::062::062::062::062::062::062: تم

[الهدايــا]

السلام عليكم ورحمة الله وبركاته
وخيييكم الهدايــا يحيييكم ويقدم لكم السالفه رقم( 3):

تفضلوااا..........

اذكر مرة لما كنت بالمرحلة المتوسطه وكان في وقتها بطولة كأس اسيا لكرة القدم( وبصراحه كنت متولع جدا بكرة القدم )
المهم كان وقت المباريات صباحا وطبعا كنت بالمدرسه ولا كنت اقدر اغيب لان ابوي شاري عصا جديده هاك السنة وانا ما بعت عمري هههههههههههه
وحتى لو جيت امي الله يجزيها بالجنه بتعلمه يعني المحصلة انه مافيه امل اروح البيت ....

وانا لازم اشوف المباراة بأي شكل لاااااازم المهم قعدت افكر واخر شي قلت يالله ما فيه الا كذا ...

واتلطم بالشماغ واجي للادارة والقى هاك الرجال (الفراش) اللي ماخذ راحته على كرسي المدير وقلت له وين ابو ناصر (اقصد المدير ) قال ماهو فيه وش تبي قلت وش دخلك انت (يقاللك عصبي اهم شي اطلع ) قال شلون شدخلني المهم ويمر احد المدرسين ويقول لي هاه سلامات وشفيك قلت والله تعبان وبطلع والمدير ماهو فيه والرجال يتفلسف مايبي يطلعني وش دخله هو اصلا قال لي المدرس شلون شدخله استاذن منه ويكفي قلت ليه استاذن منه خير ان شاء الله قاااال .... هذا الوكيل ...!!!!!!!!!!1

(كنت اتوقع في يوم من الايام ان الناس بقوة شخصياتهم وفرضها لرايها وخوف الناس منها ماهو الاحترام البسيط الناتج عن الحب مثل الوكيل الله يذكره بالخير ويجمعني به في الجنه ياااربي لاني كنت اشوفه بسيط ويشيل الاشياء من الارض وتوقعت انه الفراش)

هااااااااه والله ؟؟؟؟ وابلع ريقي بغي يجيني تسمم المهم اشوى على دخلت المدير ابوناصر قال سلامات ياولدي قلت ابد والله بس تعبان يوجعني راسي والمشكله اني ماسك بطني (والله النصاااااااااب)

المهم قال لي مسموح واروح طبعا الحين طلعت من المدرسة بس ما معي سياره لا اقدر اروح للبيت لا يدرون اهلي قلت ما فيه الا الحلاااااااق ....سنايدي والله
وفعلا قعدت ادور على اكثر حلاق زحمه عشان مايوصلني الدور بسرعه واقعد اطالع براحتي ....
المهم والقى ذاك الحلاق اللي يالله تلقى مكان تجلس واقعد اطالع ماخذ راحتي المهم يوم شوي ويقول الحلاق نعيما ويقوم الشخص ولا هو مدرس الجغرافيا .......!!!!!!!لحوووووووووووووول.....
وش ذا النصيب ياااربي المهم واتلطم واشوى ما شافني وطلع شوي ويجي الحلاق ويقول تفضل اخوي ......!!!!!!!! خيييييييير والناس هذولا وش فيهم ليه ما يحلقون قال لالا بيتفرقوا على المتش ( وانا في نفسي اقول حسبي الله عليك وعليهم يا جعلي اتفرق عليك واتنين صعايده بيدوك على افاك لما يبان لك صاحب ) بس عاد استحيت اقوله اني بطالع المباراة بعد انا وعلى بالي ماسك سرا معهم ....... والله الحاله المشكله مافيه شي احلقه هههههههههه
ودي اروح اجيب باروكه واحلق منها بس اشوف المباراة المهم قلت له شوي وراجع لك قال اوكي وطبعا رحت المدرسه سييييدة
وانا قرفان (والله النحس هههههههههههه) وبصراحه ماعاد كذبت على المدير بعدها وهي المرة الاولى والاخيره .....

ان شاء الله تكون اعجبتكم وتقبلوا مني ارق التحايا

وخيييكم

الهدايــا

[أحمد]

حبل الكذب قصير ..............
تسلم على السالفة .............
ضحكتني وأنا علي حرارة؟؟؟

[الهدايــا]

الله يسلمك اخوي احمد ..

وسلامتك من الحرارة وانا اخووك




الهدايـــا

[بدر]

ولله النصاب http://smilies.sofrayt.com/1/r/bigdance2.gif

http://smilies.sofrayt.com/1/r/biggrin.gifhttp://smilies.sofrayt.com/1/r/biggrin.gifhttp://smilies.sofrayt.com/1/r/biggrin.gif

حلووووووووووووووووووووه سالفتك كثر منها

[الهمام]

مساء الخير اخي الكريم الهديا وكل عام وانت بخير .

اشكرك على طرحك لهذا الموضوع والذي بحق يعبر لنا ماتكنه بداخلك من فكر يستحق ان

يطرح في هذا الموقع فنحن في حاجة ماسة إلى مثل هذه النوعية من المواضيع التي تنمي بيننا

روح التنامي في التعبير والحفظ والإجادة في الطرح الجميل .لقد أوجدت بفكرتك هذه ديوانية

لجميع الأعضاء لتبادل القصص والمواقف الجميلة والمحزنه وكذلك الطريفه فلابد ان نطلق على

هذه الفكرة اسم ( ديوانية الهدايا ) نسبة لصاحبها ورغم انها ديوانية صامته إلا ان فيها قيمة

وفائدة عظيمه.اشكرك اخي ومن واجبنا حضور هذه الديوانيه والمشاركة بها وتقبل تحياتي

[الهدايــا]

هلااا بدر ..

الله يحلي اياااامك ياااارب .


شرفت ونورت ...



الهدايـــا

[الهدايــا]

هلا اخوي الغالي الهمام...

والديوانيه ملك لك وللجميع ومثل ما تفضلت المفترض فيها تبادل معارف وقصص والمجال
مفتوح للجميع

بس اشوف الجماعه مستحين شوي ..


الله يحييك عدد ما مشيت وانا اخووك.....





الهدايـــا

[الرايق]

ههههههههههههههههههههههه

بس فيه ملحوضه صغيره على قصتك الثانيه شايب وكوفففففي شوب مايجتمعون وشلون راح معك اكيد قلت له دراهم يووووزعون دراهم

[الهدايــا]

هلا اخوي الرايق


شسوي له يبي قهوه ... ويحسب كل قهوه قهوه ....

[جي سي ار]

تحياتي أخي الفاضل الهدايا
نأمل منك المزيد والجديد
وتقديري الاستاذ الهمام على
فكرة الديوانية وهذا اقل شى لصاحب الامتياز

جي سي ار

[الهدايــا]

هلا اخوي الغالي جي سي ار

ابشر بالجديد ان شاء الله واتمنى من كل الاعضاء التفاعل مع المجلس وطرح ما عندهم .. لتعم الفائده ..


الهدايـــا

[المهندس]

هههههههههههههههههههههههههههههه :062: :062:

الله يعطيك العافيه تبغى الجد تقطع بطني من الضحك


قصص حلوه تثبت قدرتك الابداعيه على صياغتها باسلوب جميل


ذكرتني بحلاق مصري اذا جى وقت المباريات تشوف محله كنه اساد رياضي من كثر المشاهدين للمباريات عنده


الله يعينك لو انهزم او دخل مرمى الاهلي المصري هدف وهو جالس يحلقك مصيبه قل على نفسك السلام:glups::glups:


تحياتي

المهندس

[الهدايــا]

هلا والله بالمهندس ...


يكفي انها اعجبتك وانبسطت منها ...


اما بالنسبه للحلاق المصري ..حتى لو مباراة بين الاهلي والزمالك ادخل ومعك بريال طعميه وبريالين فول يحلق الحاره كلهم بلاااااش ...



خلينا نشوفك على طوووول يا بش مهندس ...



الهدايـــا

[حمد]

على طاري الطعمية والفول ..

أمس حصل لي موقف ما أدري هو طريف او مخيف ...

المهم انا في مكه الآن .. و كانت المناوبه عندي من الساعة 12 صباحا - 8 صباحا


وفي حدود الساعة 3 فجرا حصلت شخص يمشي في الشارع كبير في السن غريب عن البلد ، وجلس يتكلم بكلالالالالام غير مفهوم ابدا ابدا ..

انا حاولت افهم ما قدرت ابد ، حاولت انه يسكت علشان احاول أركز واعرف وش يبي بالضبط .

المهم طلع الرجال مضيع السكن حقهم والمسكين كل الليل وهو يبترم في مكه يدور العماره ، و الحمدلله لقيت معه ورقه فيها بعض الوصف . طلعت معه للشارع وحصلت سكن دوله من اوزبكستان وقلت خل نسأل يمكن .. نحل مشكلته .

والحمدلله لقيت واحد من شباب مكه ، عرف الوصف مضببوط وركب الشايب معه بالدباب وطلع معه ، والرجال من الفرحه ما يعرف وش يقول .

سبحان الله ... صحيح الغربه عن البلد شئ مخيف .. و الأخوف منه اذا كنت ما تعرف تتكلم مع سكان البلد .

[الهدايــا]

اهلين فيك ياااحمد ...

نور المجلس والله فيك وبسواليفك ...


والله مساكين هالاجانب ..وانت جزاك الله الف خير اللي ساعدته وهذا واجبنا كلنا ..

بس احلى شي لما قلت انه من الفرحه ما يدري وش يقول ... ههههههههه المشكله حتى لو

قال ماراح تفهم عليه ......

تقبل تحياتي ... ولا تقطع فينا عاااد...

اخووك


الهدايـــا