ماليزيا ..... الجزء الأول

[حمد]

http://alauda.jeeran.com/Ma%20(22).psd.jpg




السلام عليكم

هذا تقرير رحله احد الأحبه الى ماليزيا لهذا الصيف 2006 وراح يكون على جزئين عشان ما تثقل الصفحة بالصور علماً اني قللت دقة الصور لظروف التصفح ..

في البداية واجهت مشكلة في حجوزات الطيران وانصح اي واحد يبي يسافر يحجز قبل الصيف .. عموماً حصلت حجز على الخطوط السيرلانكيه .. شفت قيمة التذاكر وقارنتها بالخطوط السعودية ولقيت الفرق تقريباً 2000 ريال والله فرق مهوب سهل بس الرحله راح تتوقف في كولمبو عاصمة سريلانكا لمدة ساعة ثمن نركب طيارة ثانيه الى كولا لمبور والخطوط السعودية دايركت الى ماليزيا بدون توقف .. فدرست الموضوع وقررت السفر ..

في البداية توقعت الطيارة بتكون كلها شغالات cb: هع هع هع لكن تفاجأت ان نصف الركاب عوائل سعودية فريحني هالشي والشي الثاني ان مستوى الخدمة ونوع الطيارات كان جيد والحمد لله ، وسمعت ان طيران الامارات يتعامل معهم او مستثمر عندهم او شي من هالقبيل ..

بعد حجوزات الطيران استشرت بعض الاصدقاء وجمعت معلومات عن طريق النت عن ماليزيا وسويت لي برنامج وحجزت الفنادق والطيران الداخلي عن طريق مكتب سياحي ..

بدأنا الرحلة من الرياض ووصلنا بعد 4 ساعات الى كولمبو وصلينا الفجر وانطلقنا لكوالا لمبور بعد انتظار اقل من ساعة ووصلنا ولله الحمد بعد تقريباً 3 ساعات ونصف وتوجهنا فوراً الى سلنجور واللي تبعد عن المطار نصف ساعه وبالتحديد الى فندق براميدا وكانت الخطة هي الراحة لمدة ليلتين من السفر ثم التوجه للجزر

تتميز سلنجور بوجود الاسواق ومدينة العاب مائية ( صن واي لوقن )

http://alauda.jeeran.com/Ma%20(104).psd.jpg

http://fam.jeeran.com/012.jpg


بعدها اقلعنا بالطيران الداخلي الماليزي الى جزيرة لنكاوي وكان المقرر الاقامة فيها لمدة 3 ليالي والاقامة في فندق هولدي فيلا

صراحه لنكاوي من اجمل الجزر الماليزية وتتميز بالطبيعة الجميله وبالبساطة يعني كل شي اخضر وبيوتهم اكواخ وحياتهم بسيطة وما فيه مباني كبيره وهذا اللي اعجبني فيها غير شواطئها الحلوة والنظيفة ..

اليوم الاول طلعنا في رحلة نهرية بقارب خاص وانطلق بنا في مكان ما اقدر اوصفه الصراحه يعني طبيعه خلابه وجو منعش وبين جبال خضراء

http://alauda.jeeran.com/Ma%20(128).psd.jpg


ووقفنا عند كهف مليان خفافيش هع هع هع ثمن مشينا ووقفنا عند مزرعة للاسماك وريحنا وشربنا عصير وشفنا انواع كثيره للاسماك والحيوانات البحريه وقعدوا يشرحون لنا بالانقليزي jup: هع هع هع وانا اقول يس يس وانا مدري وين الغنم سارحه :hehe: هع هع هع واكتشفت في هالرحله اننا يالسعوديين الوحيدين اللي ما نعرف انقليزي يعني كل الجنسيات من اجانب وهنود وخليجيين وعرب يتكلمون انقليزي وحنا تقل طرمان نقول كلمة ونتعتع شوي على ما نركب جملة وهذا يرجع للتعليم عندنا !! :5w8:

المهم بعدها انطلقنا بالقارب وشفنا من بعيد شواطئ تايلند ورجعنا وانتهت الرحله بعد تقريباً 3 ساعات وتوجهنا بعدها الى حديقة الطيور وقعدنا نشوف اشكال وانواع الطيور

http://fam1.jeeran.com/L%20132.psd.jpg


بعدها توجهنا الى الشلالات ودخلنا في وسط الغابة الين وصلنا لها وقعدنا نطافش ونشرب من هالمويه الحلوة والباردة

http://fam1.jeeran.com/M (20).psd.jpg


وبعدها رجعنا للفندق بعد يوم ممتع وريحنا وتغدينا وطلعنا لشاطئ الفندق الجميل


في اليوم الثاني رحنا شوي نتمشى ونتسوق وبعدها توجهنا للآبار السبعة وهي من افضل الشلالات اللي شفتها في ماليزيا وفيها ناس واجد اللي يسبح واللي يصور -----> مهوب انا h: هع هع هع

http://fam1.jeeran.com/Lank%20005.psd.jpg


قعدنا نتأمل في هالطبيعة الزينه وتشطرنا شوي عن الناس وتوضينا وصلينا ويالله من فضلك ... وجنب الشلالات محلات صغيره شلخوا لنا جوز الهند وشربناه لاول مره وطعمة ما اعجبني مره لاني متعود على الجح oa: هع هع هع وبعدها رجعنا للفندق وتغدينا وريحنا وطلعنا لشاطئ الفندق نكمل باقي النهار فيه والناس اللي يلعب واللي يتمشى واللي يركب دباب واللي يطافش وكان الغروب جميل

http://fam1.jeeran.com/M%20(6).psd.jpg


من بكره طلعنا لرحلة بحرية للجزر الثلاث بس اني نسيت اسمائهن ما عدا جزيرة المرأة الحامل لان شكل الجزيره كنه حرمه حامل وكان معنا اجانب وعرب على السفينة وقعد يشرح لنا السواق عن كل جزيرة نجيها وانا طبعاً فاهم كل شي :huh: هع هع هع بعدها توجهنا لجزيره شاطئها حلو مره وفيها قروده

http://fam1.jeeran.com/M%20(26).psd.jpg


جلسنا فيها ساعه واللي سبح واللي يتمشى واللي يركب دباب بحري وبعدها مشينا لجزيرة غريبة شوي في وسطها بحيره كبيره بين الجبال مويتها راكده تستاجر قارب صغير مره ياخذ شخصين وتاخذ دوره لمدة نصف ساعه في هالبحيره وصراحه كانت ممتعه مره ومناظرها خلابه وبعدها رجعنا للقارب وانطلقنا لمكان بين الجزر مليان نسور ووقفنا القارب وقعد ينطل السواق قطع سمك في البحر ثمن نزلت هالنسور تلقط السمك من الماء وحنا نتفرج ونصور

http://fam1.jeeran.com/M%20(25).psd.jpg


وبعدها رجعنا بعد رحلة ممتعه

في اليوم الرابع كان السفر بالطائرة لجزيرة بيننق وفي اقل من ساعة وصلنا والحمد لله

بيننق جزيرة مثل لنكاوي لكنها متطورة ومليانه مباني وسكانها اكثر وغالبيتهم من الصينيين

توجهنا الى مقر اقامتنا فندق هوليدي ان بيتش وصراحه من افضل الفنادق اللي سكنتها .. فندق نظيف والغرفه وسيعه واطلالتها حلوه وشاطى الفندق ممتاز جداً وبجانب الفندق سوق ليلي على شكل بسطات كله بضائع صينيه رخيصه بس لازم تكاسر والا بيلعبون عليك ...

مدة الاقامة في جزيرة بيننق 5 ليالي

في اليوم الاول توجهنا لحديقة الفراشات وشفنا اشكال وانواع الفراشات سبحان الله العظيم ..

http://fam1.jeeran.com/M%20(36).psd.jpg


بعدها رحنا لحديقة الفواكة في مكان مرتفع ودفعنا المقسوم وركبونا في باصات صغيره وطلعوا بنا فوق الجبل وقعدوا يشرحون لنا عن الفواكة وانواعها وتصدقون شفت عندهم جح اصفر هع هع هع بعدها قدموا لنا انواع واشكال الفواكة وعصيرات طازجة ..

http://alauda.jeeran.com/Ma%20(76).psd.jpg


بعدها رحنا لحديقة القرود وقعدنا نضحك على هالقرود ونصورها هع هع اعجبتني ذا القرده تفلي ولدها هع هع هع:)

http://alauda.jeeran.com/Ma%20(48).psd.jpg


ثمن طلعنا منها لحديقة الزهور وتمشينا فيها وشفنا اشكال وانواع الزهور .. بعدها رجعنا للفندق وتغدينا واستمتعنا باقي النهار في شاطئ الفندق وخليتهم يدلكون رجلي هع هع قعد ربع ساعه في اصابع الرجلين هع هع :devlish: وناسه وركبنا دباب بحري وخيل وصراحه كان هالشاطئ متعه لحاله ..

http://fam1.jeeran.com/M%20(35).psd.jpg


في اليوم الثاني رحنا للقطار اللي يطلع هضبة بيننق وهو قطار يطلع لمكان مرتفع جداً والطريق كله بين الاشجار والمناظر روعه لا وكانت تمطر في نفس الوقت

http://www.friendsoflight.com/pp/data/500/r7eel.jpg


طلعنا فوق الجبل وصرنا نشوف بيننق كلها وكان المنظر خيالي والجو غيم وامطار ولله الحمد وبعدها نزلنا وطبعاً كل هذا كان في 3 ساعات .. وبعدها رحنا لمعبد بوذا النائم يا عله ما يقوم هع هع هع

http://sadaaa.jeeran.com/M%20(50).psd.jpg


قالوا فصخوا نعالكم تكرمون وفصخناها ودخلنا واذا فيه تمثال كبير منسدح وفيه اصنام تحت يجون يسجدون لها وفيه ورا زي الدروج في وسطها علب وعلى كل درج صورة واحد وسألنا السواق قال هذولا اللي يموتون يحرقونهم ويحطون رمادهم في هالعلب قلت اللهم لك الحمد على نعمة الاسلام ..

http://sadaaa.jeeran.com/M%20(53).psd.jpg


بعدها رحنا لمعبد الافاعي وصاير ذا المعبد مكان سياحي كلن يجي ويصورونه مع الافاعي بفلوس طبعاً ، وخربتها ومسكت داب عريضة وصورت معها .. وقعدنا نتفرج على اشكال وانواع الافاعي ورجعنا للفندق

http://sadaaa.jeeran.com/M%20(59).psd.jpg


في اليوم الثالث نسقنا مع منظم رحلات بحريه واستأجرنا قارب خاص مع السواق وطلعنا رحلة بحريه وكان الجو غيم ومن ابدع ما يكون

http://fam1.jeeran.com/M%20(23).psd.jpg


وبدينا بصيد السمك :0z1: وابشركم صدت سمكتين بس صغار شوي هع هع هع بعدها انتقلنا لجزيره وكان في استقبالنا عمال الشركة اللي اخذت منهم القارب وقدموا لنا الماء والفواكة وتمشينا شوي في الجزيرة الين جهزوا لنا الغداء وهو عباره عن مأكولات بحريه مشويه اشكال وانواع وبعدها رجعنا للفندق ..

والعصر كان على شاطى الفندق وفي الليل رحنا للسوق الليلي اللي جنب الفندق وهو على شكل بسطات وغالب اللي يبيعون هم صينيين وبضاعتهم صينيه والسوق مزدحم بالناس من جميع الجنسيات ولازم الواحد يكاسر لانه يقولك بـ 100 وفي النهايه تشتري بـ 20 ريال وتلقاه لاعب عليك بعد بس لو تلقى هالسلعة عندنا في السعودية بتشتريها بـ 70 ريال
وفي نفس الشارع لقينا بعض المطاعم العربية وحطيت حرتي في الرز لان الاكل في ماليزيا بشكل عام مهوب زين ... وضحكت على مصري راعي مطعم مشغل اغاني عربيه وحاط السماعه برا ومطلع ثنتين من البنات اللي يشتغلون في المطعم عند الباب يصفقون مع الاغنيه عشان يجذب الزباين هع هع مسوي ملكع الله يرجه sَ


في اليوم الرابع رحنا لمبنى كومتار وهو من اطول المباني في بيننق وطلعنا للدور الاخير وقعدنا نتفرج على بيننق كلها

http://fam1.jeeran.com/M%20(49).psd.jpg


بعدها توجهنا لاحد المجمعات التجارية وتسوقنا وتمشينا وبعدها رجعنا للفندق وكالعاده باقي النهار في شاطئ الفندق

في اليوم الخامس رحنا لحديقة الحيوان وتمشينا فيها وبعدها رحنا لحديقة الاسماك وفيها احواض واسماك من كل شكل ونوع وبعدها توجهنا لاحد الحدائق الجميله وتمشينا فيها وبعدها خذنا لفه في احد الاحياء الراقيه في بيننق وشفنا بيوت التجار والسياسيين ورجعنا

بكذا ينتهي الجزء الاول من الرحله والجزء الثاني في موضوع مستقل عشان نخفف التصفح



مع السلامة

[اشراقة الصباح]

وانا اقراء تفاصيل الرحله كانني انا التي اتكلم ..تذكرت جميع المواقف التي حصلت في رحلتي الى ماليزيا..

عانينا كثيرآ في الحجز .وقد نصحنا بعض الاقارب باالحجز عبر الخطوط السيرلانكيه..قلت معصي والله مااركب مع شغالات..مو كبر والله..بس لاحظو المده طويله ..راح تكون الاجواء غير مناسبه وبس:)


جزيرة لنكاوي هذي لها قصه من زود السناعه قلت ماراح نروح باالطياره نروح عن طريق البحر..اكيد راح تكون رحله جميله

الله لايعيد ذاك اليوم

ونركب ذيك الباخره الي ماادري وشلون قايله فيه اعداد هائله..

وقلق وازعاج..غير كذا جلسنا ثلاث ساعات..واهلي يقولون لي مفروض ماسمعنا كلامك..كان رحنا باالطياره اريح لنا..

وللاسف كان الجوسيء للغايه هواء وامواج وتخيلو لونا طايحين في البحر مغير حيوانات اشكال والوان كان اكيد عشاء للقروش ذالك اليوم..

الغرض من التطويل هذا كله ابعدو عن شي اسمه بحر وسلامتكم

فيه اشياء ماذكرت بس اكيد الاخ حمد راح يذكره في الجزء الثاني


ومشكووووووووور اخي الكريم حمد على هذه الرحله الرائعه

[حمد]

حياك الله اشراقه


بالنسبه للرحله من لنكاوي إلى بينانج فهي ممتعه بالبحر

وفيها تجربه جديده ..

صح متعبه شوي .. ولازم تقوم الصباح بدري



حياك الله .. :)

[ابوعبدالله]

تقرير ابداااااااااااااع

صور جميله جدا


يعطيك العافيه

[بدر]

http://fam1.jeeran.com/M%20(25).psd.jpg

صراحه المصور عالمي

[الأمير]

يعطيك العافيه حمد..

وصرااحه ماليزيا حللوه..

بس مشكلتنا الحيين..صارت ملجأ السعودين بالذاات

يمكن منول مافيها احد..قليل يعني

بس الحيين مليااانه سعوديين..

ننتظر الجزء الثاني

[عبدالله]

مشكور ياحمد على النقل

الصراحه تقرير رائع والصور خرافية !! ماشاءالله عليه حالم ليل ..

في الإحتراء